दक्षिण महाराष्ट्र आणि कोकणात पावसाचा जोर वाढणार; मराठवाडा व विदर्भातही विखुरलेल्या सरींची शक्यता.
विशेष प्रतिनिधी, पुणे:
राज्यात मान्सूनोत्तर पावसाचे पुनरागमन झाले असून, येत्या २४ तासांत हवामानात मोठे बदल अपेक्षित आहेत. बंगालच्या उपसागरात श्रीलंकेच्या पूर्वेला तयार झालेले कमी दाबाचे क्षेत्र (Low-Pressure Area) आता अधिक सक्रिय झाले असून, त्याचा संभाव्य मार्ग आणि तीव्रतेमुळे राज्यात पावसासाठी पोषक वातावरण निर्माण झाले आहे. या प्रणालीसोबतच अरबी समुद्रातही कमी दाबाचे क्षेत्र टिकून असल्याने राज्यात पूर्वेकडील बाष्पयुक्त वाऱ्यांचा प्रभाव वाढला आहे.
बंगालच्या उपसागरातील प्रणालीचा प्रवास कसा असेल?
भारतीय हवामान विभागाच्या अंदाजानुसार, आज (२१ ऑक्टोबर) सकाळी बंगालच्या उपसागरात तयार झालेले कमी दाबाचे क्षेत्र (L) उद्यापर्यंत (२२ ऑक्टोबर) तीव्र कमी दाबाच्या क्षेत्रात (Well Marked Low-Pressure Area – WML) रूपांतरित होईल. त्यानंतर परवा, २३ ऑक्टोबरपर्यंत त्याचे रूपांतर डिप्रेशनमध्ये (Depression – D) होऊन ते चेन्नईच्या किनारपट्टीजवळ पोहोचण्याची शक्यता आहे. या प्रणालीचा संभाव्य मार्ग तामिळनाडू आणि आंध्र प्रदेशच्या किनारपट्टीवरून कर्नाटक मार्गे अरबी समुद्रात पुन्हा प्रवेश करण्याचा असू शकतो. यामुळे पुढील काही दिवस दक्षिण भारतात जोरदार पाऊस अपेक्षित आहे.
राज्यात कुठे आणि कसा असेल पावसाचा प्रभाव?
बंगालच्या उपसागरातील प्रणालीमुळे राज्यात पूर्वेकडून येणाऱ्या वाऱ्यांचा वेग वाढला असून, हवेत बाष्पाचे प्रमाण वाढले आहे. त्यामुळे पुढील २४ तासांत खालील भागांमध्ये पावसाची शक्यता आहे.
-
कोकण आणि दक्षिण महाराष्ट्र (जास्त प्रभाव): रत्नागिरी, सिंधुदुर्ग, कोल्हापूर, सांगली, सातारा आणि पुणे जिल्ह्याच्या पूर्व भागात पावसाचा जोर वाढण्याची शक्यता आहे. या भागांत विजांच्या कडकडाटासह मध्यम ते जोरदार सरींची शक्यता आहे. बेळगाव आणि गोवा परिसरातही पावसाचा जोर राहील.
Ads×कॉल करा₹ किंमत पहाखरेदी करा -
मराठवाडा आणि विदर्भ (मध्यम प्रभाव): सोलापूर, धाराशिव, बीड, जालना, छत्रपती संभाजीनगर, बुलढाणा, अकोला, वाशिम, हिंगोली, परभणी आणि अमरावतीच्या काही भागांत विखुरलेल्या स्वरूपात हलक्या ते मध्यम पावसाची शक्यता आहे. येथे सार्वत्रिक पाऊस नसला तरी, काही ठिकाणी विजांच्या कडकडाटासह सरी कोसळू शकतात.
Ads×कॉल करा₹ किंमत पहाखरेदी करा -
उत्तर महाराष्ट्र (कमी प्रभाव): जळगावचा पूर्व भाग, तसेच धुळे, नाशिक, नंदुरबार, ठाणे, पालघर आणि मुंबई या भागांमध्ये हवामान कोरडे राहण्याची शक्यता आहे. मात्र, स्थानिक ढगनिर्मिती झाल्यास तुरळक ठिकाणी पावसाच्या हलक्या सरींची शक्यता नाकारता येत नाही.
सध्या राज्यात पावसासाठी पोषक वातावरण तयार झाले असून, विशेषतः दक्षिण महाराष्ट्रातील शेतकऱ्यांनी पिकांच्या काढणीचे नियोजन हवामान अंदाज पाहूनच करावे, असे आवाहन करण्यात आले आहे.
