बंगालचा उपसागर आणि अरबी समुद्रातील दुहेरी प्रणालींमुळे पोषक स्थिती; उत्तर महाराष्ट्र, विदर्भ आणि मराठवाड्यात पावसाची दाट शक्यता.
विशेष प्रतिनिधी, पुणे, दि. २२ ऑक्टोबर:
राज्यातून मान्सूनने माघार घेतली असली तरी, बंगालचा उपसागर आणि अरबी समुद्रात एकाच वेळी तयार होत असलेल्या कमी दाबाच्या क्षेत्रांमुळे राज्यात पुन्हा पावसासाठी पोषक वातावरण निर्माण झाले आहे. या दुहेरी प्रणालींच्या प्रभावामुळे पुढील काही दिवस राज्याच्या विविध भागांत मेघगर्जनेसह पावसाच्या सरी कोसळतील, असा अंदाज हवामान अभ्यासकांनी वर्तवला आहे. विशेषतः आज (मंगळवार) उत्तर महाराष्ट्र आणि विदर्भाच्या उत्तर भागात पावसाची शक्यता अधिक आहे.
दुहेरी प्रणालींमुळे राज्यात पावसाळी स्थिती
हवामान अंदाजानुसार, सध्या बंगालच्या उपसागरात आणि अरबी समुद्रात तीव्र कमी दाबाची क्षेत्रे सक्रिय आहेत. पुढील काळात या दोन्ही प्रणालींची तीव्रता वाढून त्यांचे रूपांतर ‘डिप्रेशन’मध्ये होण्याची शक्यता आहे. यासोबतच, राज्यात बंगालच्या उपसागरावरून येणाऱ्या बाष्पयुक्त पूर्वेकडील वाऱ्यांचा प्रभाव वाढला आहे. या एकत्रित परिणामांमुळे राज्यात अस्थिर हवामान निर्माण झाले असून, पुढील अनेक दिवस वेगवेगळ्या जिल्ह्यांमध्ये स्थानिक पातळीवर ढगनिर्मिती होऊन विजांच्या कडकडाटासह पाऊस हजेरी लावेल. हा पाऊस सर्वत्र एकाच वेळी न होता, विभागानुसार वेगवेगळ्या दिवशी बरसण्याची शक्यता आहे.
आज (२२ ऑक्टोबर) या जिल्ह्यांमध्ये पावसाचा अंदाज:
पुढील २४ तासांत खालील जिल्ह्यांमध्ये विजांच्या कडकडाटासह पावसाची शक्यता वर्तवण्यात आली आहे:
-
उत्तर महाराष्ट्र आणि विदर्भ (जोरदार पावसाची शक्यता):
जळगाव, धुळे (उत्तर भाग), बुलढाणा, अकोला, अमरावती, वर्धा आणि नागपूर जिल्ह्यांच्या उत्तर पट्ट्यात मेघगर्जनेसह पावसाचा अंदाज आहे. या भागांत पावसाचा जोर अधिक असू शकतो.Ads×कॉल करा₹ किंमत पहाखरेदी करा -
मध्य महाराष्ट्र, मराठवाडा आणि कोकण (मध्यम शक्यता):
नाशिक, छत्रपती संभाजीनगर, अहिल्यानगर, जालना, पुणे, सातारा या जिल्ह्यांत विखुरलेल्या स्वरूपात पावसाच्या सरींची शक्यता आहे. तसेच पालघर, ठाणे, मुंबई, रायगड आणि रत्नागिरी या कोकण किनारपट्टीच्या भागांतही हलक्या ते मध्यम पावसाचा अंदाज आहे. मराठवाड्यातील बीड, परभणी, नांदेड आणि लातूरच्या उत्तर भागांतही तुरळक ठिकाणी पाऊस होऊ शकतो.Ads×कॉल करा₹ किंमत पहाखरेदी करा -
दक्षिण महाराष्ट्र (तुरळक पावसाची शक्यता):
सोलापूर, सांगली, कोल्हापूर, सिंधुदुर्ग तसेच लगतच्या गोवा आणि बेळगाव सीमाभागातही मेघगर्जनेसह पावसासाठी अनुकूल स्थिती आहे.
पूर्व विदर्भात हवामान कोरडे राहण्याची शक्यता
एकीकडे राज्यात पावसाचे पुनरागमन होत असले तरी, पूर्व विदर्भातील भंडारा, गोंदिया, चंद्रपूर आणि गडचिरोली या जिल्ह्यांमध्ये हवामान प्रामुख्याने कोरडे राहण्याचा अंदाज आहे. तसेच नंदुरबार जिल्ह्यातही पावसाची शक्यता सध्या कमी आहे.
शेतकऱ्यांनी आणि नागरिकांनी बदलत्या हवामानानुसार नियोजन करावे आणि विजांच्या कडकडाटाच्या वेळी सुरक्षित ठिकाणी थांबावे, असे आवाहन करण्यात आले आहे.
